Fernando Alonso ka lëshuar një provokim mjaft interesant ndaj rivalit të tij në luftën për titullin kampion, Sebastian Vetel, duke deklaruar se as ai e as skuadra e Ferrarit nuk është e shqetësuar nëse nuk fitohet botërori i Formula 1 në këtë sezon.
“As unë dhe as skuadra nuk kemi nevojë urgjente për një titull kampion. Vitet 2011 dhe 2012 kanë qenë të jashtëzakonshëm si për mua, ashtu edhe për skuadrën, pasi kemi arritur që të bëjmë të gjithë në një mendje përsa i përket rezultateve dhe vlerësimit ndaj nesh. Si pilot, mund të them se një gjë e tillë nuk ka ndodhur as kur fitova dy titujt kampion dhe për këtë arsye mund të them se jam maksimalisht i lumtur edhe kështu”, tha piloti që aktualisht është i dyti në renditjen e kampionatit botëror.
Sikur të mos mungonte kjo, pak ditë para garës së Abu Dabi, Alonso ka lëshuar edhe një tjetër thumbim ndaj kryesuesit të kampionatit, Sebastian Vetel, duke vlerësuar më shumë se ai britanikun e MekLaren, Luis Hemilton.
“Gjendemi në situatën ku mund të luftojmë ende për titullin kampion, nuk është surprizë që kam rival Sebastian Vetel. Ai është një pilot i madh por mendoj se Hemilton është më i fortë, pasi siç e kemi parë të gjithë është gjithmonë i përfshirë në luftën për fitoren e garave, edhe kur nuk ka një makinë konkurruese. Të gjithë pilotët e tjerë nuk e kanë të njëjtën vazhdimësi”.
“Ne po mundohemi të përmirësojmë makinën sa më shumë që të jetë e mundu për garat e fundit. Do të ishte diçka e bukur që në Abu Dabi të përfundoja para Vetel, edhe më mirë nëse fitoj”, përfundoi piloti spanjoll i Ferrarit, i cili deri dy gara më përpara kryesonte renditjen e botërorit për pilotë.
Share
& Comment
Tweet